МОЛИТВА ЗВОНАРЕЙ
О ЦЕРКВИ И ОБ ОТЕЧЕСТВЕ ПЕРЕД ЗВОНОМ,
возглашаемая в храмах Украинской Православной ЦерквиГосподи Боже наш, во Святей и Единосущней и Животворящей и Нераздельной Троице покланяемый и славимый, смиренно молим Тя, на множество щедрот Твоих дерзающе, прости грехи наши, и ум наш просвети, и разум даждь Тебе угодное в молитве испросити, и делом исполнити волю Твою святую. Помилуй, Господи, и спаси, Великого Господина и отца нашего Алексия, Святейшего Патриарха Московского и всея Руси, и Господина и отца нашего Блаженнейшего Владимира, Митрополита Киевского и всея Украины, и Господина нашего... , настоятеля святаго храма сего..., с братиею и прихожанами, братством и сестричеством и благоукрасителями святаго храма сего, и весь причет церковный, в монашестве и иночестве сущия, и вся православныя христианы.
Еще молимся Тебе, Господи, Боже наш, укрепи и умножь Церковь Твою Соборную и Святую по всему лицу земли. Призри, Господи, милостивно и на святыя храмы и обители православныя, на веси и грады Богохранимыя страны нашея, на властей и воинство ея. Наипаче призри, Владыко, на град наш, а вся люди Твоя, даруй им здравие духовное вкупе с телесным, трезвление, целомудрие, смиренномудрие и терпение, молитву сердечную, грехов содеянных покаянное исповедание и оставление по велицей Твоей милости. Даруй, Господи, и крепких семей умножение и боголюбивых чад рождение, да имут достаток в доме трудами своими праведными, и да поживут непорочно долгоденственное и мирное житие.
Благослови, Господи, звон нынешний, да услышавше его цельбоносный глас людие Твои во благочестии и вере истинной укрепятся и заповедей Твоих исполнению ревнуют, и крепко всем диавольским наветам сопротивостанут и в храм Твой на молитву сердечную и славословие Имени Твоего Святаго да притекут. Да утолятся же и утишатся, и престанут гласом звонов сих и силы, твердь земную сотрясающия и сокрушающия. Сохрани нас, Господи, от злорастворений вод горьких и пагубных, и вредоносных тлетворных воздухов и огня, отведи от пределов сих и громы страшныя и молнии и бури ветренныя, несущия облаки градныя, и прочыя напасти.
Молим Тя, Многомилостиве Господи, сии и прочии напасти отведи, и люди Твоя сохрани, и сподоби нас, грешных и недостойных, искусно и благоговейно звоном огласити верных в храме сем святом, и окрест пребывающих во благо Церкви Православной и Богохранимыя страны нашея.
Яко подобает Тебе всякая слава, честь и поклонение, Отцу, и Сыну и Святому Духу, ныне и присно, и во веки веков. Аминь.